صافيناز طلعت: قبل زيادة أيام الدراسة.. هل المدارس جاهزة بإمكانياتها فعلًا
انتقدت النائبة صافيناز طلعت أوضاع عدد من المدارس، متسائلة عن مدى جاهزيتها لاستقبال الطلاب مع بداية العام الدراسي، في ظل وجود فصول تحتاج إلى تجهيز وصيانة، وديسكات غير ملائمة لاحتياجات الطلاب.
وقالت النائبة صافيناز طلعت: «ده شكل الفصول… وده شكل الديسكات اللي هنبدأ بيها الدراسة. المديرة تطلب من الإدارة تجهيزات وصيانة ومستلزمات أساسية، ييجي الرد: مفيش».
«دبّري أمرك».. كيف تُجهز المدارس؟
وأضافت: «طيب الحل إيه؟ المدارس وصلت.. برضو دبّري أمرك. فتلاقي مديرة مدرسة تدفع من جيبها عشان المدرسة تتجهز، وأولياء أمور يشيلوا حاجات المفروض الدولة هي اللي شايلة تكلفتها».
وتابعت النائبة: «وبعدين لما المديرة تقول: أنا دفعت من جيبي، يتقال لها: متفهمنيش إنك بتصرفي على الدولة… كلام ما يدخلش عقل عيل صغير».
صافيناز طلعت: «هو فعلًا مايدخلش عقل عيل صغير.. ولا راجل كبير»
وتساءلت النائبة صافيناز طلعت: «هو فعلًا مايدخلش عقل عيل صغير… ولا راجل كبير. لو المديرة ما دفعتش، كانت هتعمل إيه؟ ولو الإدارة عندها فلوس للتجهيز، فين الفلوس؟ ولو مفيش فلوس، المدرسة هتتجهز إزاي؟».
تساؤلات حول مخصصات صيانة وتجهيز المدارس
وواصلت صافيناز طلعت تساؤلاتها: «ومين أصلًا مسؤول عن تجهيزها قبل ما نطلب من الطلاب يبدأوا بدري ونزود أيام الدراسة؟ فين وزارة التربية والتعليم؟ فين خطتها لصيانة وتجهيز المدارس؟ فين المخصصات اللي بتتحط للتجهيز والصيانة؟ بتتصرف إزاي؟ ومين بيراجعها؟ ومين بيتحاسب لو المدرسة دخلت العام الدراسي وهي مش جاهزة؟».
«مش بتكلم عن مدرسة بعينها»
وأكدت النائبة أنها لا تتحدث عن مدرسة أو مديرة بعينها، وإنما عن مشكلة تتعلق بمنظومة التعليم ككل، قائلة: «أنا مش بتكلم عن مدرسة بعينها، ولا عن مديرة بعينها. أنا بتكلم عن منظومة كاملة مينفعش يكون حل مشاكلها كل مرة: دبّروا نفسكم».
النائبة: الدولة مسؤولة عن تجهيز المدارس
وشددت صافيناز طلعت على أن مسؤولية تجهيز المدارس تقع على عاتق الدولة، وليس على مديري المدارس أو أولياء الأمور، قائلة: «الدولة هي اللي مسؤولة عن المدرسة، مش مديرة المدرسة من جيبها، ومش ولي الأمر من جيبه».
صافيناز طلعت: قبل زيادة أيام الدراسة.. جاوبونا المدارس جاهزة؟
واختتمت النائبة تصريحاتها بالتأكيد على ضرورة التأكد من جاهزية المدارس وإمكاناتها قبل زيادة أيام الدراسة أو تبكير موعد بدء اليوم الدراسي، قائلة: «وعايزين نزود أيام الدراسة ونبدأ بدري؟ ماشي… بس الأول جاوبونا: المدارس جاهزة بإمكانياتها ولا لأ؟».
وأضافت: «لأن قبل ما نحاسب الطالب على عدد أيام حضوره، حاسبوا المسؤول عن تجهيز المكان اللي الطالب هيتعلم فيه. وفين الفلوس يا وزارة التربية والتعليم؟».
